താനൂർ
ബ്ലോക്ക് പഞ്ചായത്ത്

        മലപ്പുറം ജില്ലയുടെ പടിഞ്ഞാറൻ അതിർത്തിയിൽ അറബിക്കടലിനോട് ചേർന്ന് കിടക്കുന്ന അതി പുരാതനമായ ഒരു തുറമുഖ നഗരമാണ് താനൂർ. മധ്യ കാല ഘട്ടത്തിൽ വെട്ടത്തുനാട് സ്വരൂപത്തിന്റെ ഭരണകേന്ദ്രമായിരുന്ന ഈ പ്രദേശം, കേരളത്തിന്റെ വാണിജ്യ-സാംസ്കാരിക ചരിത്രത്തിൽ സവിശേഷമായ സ്ഥാനമലങ്കരിക്കുന്നു. 1861-ൽ കേരളത്തിൽ ആദ്യമായി റെയിൽവേപാത (തിരൂർ ബേപ്പൂർ) സ്ഥാപിതമായപ്പോൾ അതിൽ പ്രധാനപ്പെട്ട ഒരുസ്റ്റേഷനായി താനൂർ മാറി. തീരദേശവും ഉയർന്ന പ്രദേശങ്ങളും കാർഷിക ഭൂപ്രദേശങ്ങളും ഉൾപ്പെട്ട അറബിക്കടലിന് ഓരം ചേർന്ന് സ്ഥിതി ചെയ്യുന്ന താനൂർ ബ്ലോക്ക് സാമ്പത്തികമായി ഇടത്തരം അവസ്ഥയിലുള്ള പ്രദേശമാണ്.താനൂർ ബ്ലോക്ക് പഞ്ചായത്ത് കേരളത്തിലെ തദ്ദേശസ്വയംഭരണ സംവിധാനത്തിന്റെ ഭാഗമായി പ്രവർത്തിക്കുന്ന ഒരു പ്രധാന ബ്ലോക്ക് പഞ്ചായത്താണ്. ചരിത്രപ്രസിദ്ധമായ തുറമുഖ നഗരമായ താനൂർ കേന്ദ്രമാക്കി രൂപീകരിക്കപ്പെട്ട ഈ ബ്ലോക്ക് പഞ്ചായത്ത്, ഗ്രാമീണ വികസന പ്രവർത്തനങ്ങളുടെ ഏകോപനത്തിനും നടപ്പാക്കലിനും നേതൃത്വം നൽകുന്നു.

കേരളത്തിൽ ത്രിതല പഞ്ചായത്ത് രാജ് സംവിധാനം ശക്തിപ്പെട്ടതോടെയാണ് ബ്ലോക്ക് പഞ്ചായത്തുകൾക്ക് കൂടുതൽ പ്രാധാന്യം ലഭിച്ചത്. ഗ്രാമപഞ്ചായത്തുകളും ജില്ലാ പഞ്ചായത്തും തമ്മിലുള്ള കണ്ണിയായാണ് താനൂർ ബ്ലോക്ക് പഞ്ചായത്ത് പ്രവർത്തിക്കുന്നത്. നിലവിൽ ചെറിയമുണ്ടം, നിറമരുതൂർ, ഒഴൂർ, പെരുമണ്ണ-ക്ലാരി, പൊന്മുണ്ടം, താനാളൂർ, വളവന്നൂർ എന്നീ ഗ്രാമപഞ്ചായത്തുകൾ താനൂർ ബ്ലോക്ക് പഞ്ചായത്തിന്റെ പരിധിയിൽ ഉൾപ്പെടുന്നു.

തീരദേശ മേഖലകൾ, കാർഷിക പ്രദേശങ്ങൾ, ജനസാന്ദ്രതയേറിയ ഗ്രാമങ്ങൾ എന്നിവ ഉൾക്കൊള്ളുന്ന ഈ ബ്ലോക്ക്, പ്രദേശത്തിന്റെ സാമൂഹികവും സാമ്പത്തികവുമായ പുരോഗതിയിൽ നിർണായക പങ്കുവഹിച്ചിട്ടുണ്ട്. കൃഷി, മത്സ്യബന്ധനം, ഗ്രാമീണ റോഡ് വികസനം, കുടിവെള്ള പദ്ധതികൾ, ആരോഗ്യ സംരക്ഷണം, വിദ്യാഭ്യാസം, വനിതാ-ശിശു ക്ഷേമം തുടങ്ങിയ മേഖലകളിൽ വിവിധ വികസന പദ്ധതികൾ ബ്ലോക്ക് പഞ്ചായത്തിന്റെ നേതൃത്വത്തിൽ നടപ്പിലാക്കി വരുന്നു.

മലപ്പുറം ജില്ലയിലെ 15 ബ്ലോക്ക് പഞ്ചായത്തുകളിൽ ഒന്നായ താനൂർ ബ്ലോക്ക് പഞ്ചായത്ത്, പ്രദേശത്തെ ഗ്രാമീണ ജനങ്ങളുടെ ജീവിതനിലവാരം ഉയർത്തുന്നതിനും സുസ്ഥിര വികസനം ഉറപ്പാക്കുന്നതിനും തുടർച്ചയായി പ്രവർത്തിച്ചുവരുന്ന ഒരു പ്രധാന തദ്ദേശസ്വയംഭരണ സ്ഥാപനമാണ്